Search This Blog

Wednesday, July 14, 2010

مقاييس مغلوطه


بسم الله الرحمن الرحيم


عوده بعد كاس العالم2010 مخيب للامال بالنسبة لي اسباب

خروج فريقي الارجنتين بخسارة مذلة من ابناء هتلر

عندي تذاكر كاس العالم و ما قدرت اروح

و عزائي الوحيد ان الي شال كاس العالم ولدنا ايكر كاسياس

--------------------------------------

كويت مكه كويت




مقايس يديده ما سمعت عنها بحياتي الكل يعرف ان المسافه تقاس بالمتر بالكيلومتر و الميل لكن من فتره قاعد اسولف مع واحد و انا اسولف معاه ياله اتصال و اهو كالعاده ما يرد طلب حق اي شخص و اسمعه بكل سعاده يقول انطرني بس اروح البيت ايب جوازي و امرك


و انا : تعال حبيب حمني و ين على الله

حمني: قال ماكو بروح العمره

انا:العمره العمره يعني مكه يعني الحرم يعني السعودية ؟؟

حمني (مع ابتسامه):اي الحين بروح

انا : و متى حجزت انا صارلي فتره معاك ما قلتلي

حمني: لا توا صاحبي قال تدويني بسيارتك قلتله اوكي

انا: و عاديه السالفه يعني ماكو درب, تعب, انت مو نايم, ترا يا حمني من الكويت لي مكه درب مو رايح الشاليهات

حمني (ببتسامه يعني الوضع عادي): لا منو يقول درب عادي كلها
.
.
.
.
.
.
.
.
.
فلاش 4 غيغه المطرف


اهني عرفت ان الوضع عنده عادي و الريال يبي يستانس و يتعبد قلتله يبا انت رايح العمره ما تبي 2 غيغه العفاسي قالي عندي بس من اندش مكان الاحرام راح احطه تدري ما ابي اثم

ههههههههههههههههه

---------------------------------

تكمله لمقاييس مغلوطه


واحد من الشباب من ربع كرة السله و ماله بكرة القدم بس مع كاس العالم قال اتابع و تقريبا كا ما اروح الدوانيه القاه مجابل المبارايات حتى الاعاده و قالي عليوي عندي فكره ودي اوصلها حق الفيفا

قلتله ادلو بلداوك يا فتى
قالي ليش ما يخلون القول الي من ورا خط الـ18 عن خمسه

ليلحين ابي اعرف شنو الهدف من التغير ماني عارف ؟؟؟

----------------------------------

ابو الحروف



طبعا هذا المسمى مو صحيح لكن من كثر ما مدير ادارتي يستخدم كلمات و بغير محلها و يحسسني اني قاعد بمجمع اللغه قاعد احاول ادوره على لقب يوفيه حقه على وزن

الحبر الاعظم

ومن مقتطفاته و كلماته الي اذكرها و راح احط كل مره كلمه يديده لكم بس ابي احد يقولي شلون واحد يستخدم هذي الكلمات بدوام مجاله العملي تجارة يعني مو مدرسة

العاقل خصيم نفسه-
يتوجس-
الحيطه و الحذر (لما قالياها حسسني اني بسوي عمليه انتحاريه)ـ-
السخط-
ودوده-
يتحذلقون (للمعلومه قالي هل كلمه عن موظفين باداره ثانيه)ـ-


------------------------------------------

21 comments:

الزين said...

زيارة اولي لمدونتك

واعتقد ماراح تكون الأخيرة

:)

Goalzalez said...

الزين
---------
حياج الله و البيت بيتج

عسى بس عجبتج بضاعتنا

عثماني said...

مساك الله بالخير ياخوي

وين هالغيبة ؟؟ مختفي

واللي يختفي طول هالمدة .. مو خالي

:)

اهم شي انك رديت تكتب

و لا تذكرني بكاس العالم ... هولندا تستحق الكاس

:(

Goalzalez said...

عثماني
------------

هلا بـ عثماني

و الله يا اخي انت مرات تقول شغلات تحسسني اني اعرفك او انك تعرفني

عموما صح كلامك مو خالي


موضوع كاس العالم موضوع كبير و هولندا تستحق بدون شك و لانها اول مره تلعب بواقيعه و ما تقط الي بجبدها كلا من بداية البطولة شفناها بالنهائي

لكن مشكلتهم بالنهائي ان روبين ما خلص المباراة و كاسياس كان بيومه

و ناطرين جديدك

عثماني said...

هلا بالحبيب

دامك منت خالي عيل الله يوفقك باللي شاغلك و عسى الله يعطيك من توفيجة و رزقه .. قول آمين

:)

انا قطيتها جذيه و شكلها اظبطت

:)

و ان كنت ما اعرفك .. بس اللي مثلك اتشرف بمعرفتهم يا خوي

:)

سلة ميوّة said...

السلام عليكم وين هالغيبة؟


ضحكتني المقاييس

@@ وبقولك شي

ترى انا من الناس الي استخدم كلمات فصحى مرات...

بس قمت احاسب وانا بالدوام وماستخدمها لأن الدكاتره أبد مايحبون بضغطون ويسون حركات

يعني شكرا جزيلاً

شفيها؟؟؟



والا دكتور ممكن أطل طلب أعانك الله!


شنو صار يعني؟؟؟
:)



لغتنا جميله
بس عاد يتوجس

ماجربت احطها بجملة مفدية ..بالخفارة اعتقد تركب:)

مساك الله بالخير

aL-NooR . said...

عودة محمودة
بوست خفيف طينة يستاهل النطرة
;p

حسااااااافة
ليش ما رحت ..عاد انا كان بخاطري اروح
لو معطينيا تذكرتك .. ومو مشكلة ندفع لكم فلوووسها ;p
و خصوصا ان المباريات كانت حلوة

بس خيرة ..ان شاء الله

يحليلة هالــ حمني
الظـــــاهر ان طيب بزودة
بس ليش قتله جذي كان بيكسب بصاحبة اجر الروحة ..و اذا على المطرف ماكو الا تاخذ الفلاش و يضطر يسمع غيره
:)


مديـــرك
مثقف .. تصدق انا استانس جذي :)
ولا جان انت الحين ما عرفت هالمفردات القلجة
:)


****************************

ميمة السبيت said...

** مساء الخير

رايح العمرة يسمع المطرف لووووووول

والله سهالات يحليلة

مشالله مواضيعك وايد حلوة بس يبيلهم فنيال قهوة مع توكس جنه مو لك عشان اقرا و استمتع

Goalzalez said...

عثماني
---------

الله الخير عثماني

الله يوفق الجميع و انا الي اتشرف بمعرفتك

Goalzalez said...

سلة ميوّة
---------

اهلا بدكتورتنا و ما اخفي عليج (حلوه اخفي هذي)ان ودي مرات اقط كلمات فصحىلكن الوضع ما ينفع نفس ما قلتي و الناس ادور الضحك .

بس قوليلي شلون تقولين اعنك الله بالدوام هذي ما تنقال الا بالاوقاف و انتي دكتوره يعني ما تركب

و اذا حصلتي جمله تنحط فيها يتوجس قوليلي عشان اردها حق مديري

Goalzalez said...

aL-NooR
-----------
اهلا بالنوووور

لا جان عطيتج التذاكر ابلاش تستاهلين احسن من ما تنحط على كراسينا جناط


و الله هذا الحمن طيبنة جنه و انا ما ابيه يروح خايف عليه من الدرب ليس الا

و بخصوص مديري و كلماته الجميلة راح اعطيج جم كلمه اذا عرفتي تحطينهم بجمله لج مني تذاكر كاس العالم 2014 بالبرازيل

Goalzalez said...

ميمة السبيت
-----------

هلا بميمتنا

نور المكان و المكان مكانج

و التوكس علي و القهوه علي بس الفنايل عليج

قاعد احاول معاه يغير المطرف ماني قادر علما بان المطرف مو جيله اصلا

ARTFUL said...

على صاحبك في وايد نفسه وأردا

في ناس جوازهم بدرج السيارة

مره اثنين من ربعي كانوا بيكشتون بجنوب الكويت

راحوا هناك جان يقولون ها نكشت داخل السعودية

توكل على الله الجوازين بالدرج طلعوهم ودخل السعودية

قعدوا بالبر قبل لا يشيلون قالوا حنا شردنا الكويت توكل على الله البحرين

راحوا البحرين

عقب راحوا قطر

تالي دقلي من الامارات يقولي تبي شي من هناك؟؟

وردوا

@@

ناس فاظيه

!!

عليهم بالعافيه

:)

الزين said...

جداااا

مو قلت لك لي عوده

قاعده انبش بمدونتك

:)

Goalzalez said...

ARTFUL
------------
هلا و الله بأرتفل

اخبارك يالحبيب

انت متأكد ان ربعك مو ماجلان و ابن بطوطه

ما شاء الله عليهم قلنا فضاوه و شباب بس
مو جذي

Goalzalez said...

الزين
-----------
المكان مكانج بس ما اوصيج اذا خلصتي تنبش ردي كل شي مكانه

Anonymous said...

اهلين
من زمان
من طول الغيبات

نريد الغنايم تستمر لاتقطع


مع اني لست من المهتمين بالكره وكاس العالم بس كان ودي هولندا تفوز عشان
ناس يبونها تفوز
وجنه الناس انشغلت شويه بكاس العالم عن الحر وطلعه المجمعات
المهم حمني الله يحفظه
L A سلم علي وقوله يوديني
بالطياره مايخالف بس كم غيغا يكفينا علي شرط انت تختار لا المطرف ولا العفاسي
اشرايك مسلسل الرجل الحديدي




ماعندي سالفه بس ابي اهذر واقولك ولهانين من زمان ما نورت
لاتطول علينا ومثل ماقال عثماني شكلك خامر علي شي
شنو هو الله اعلم
بس مبين النفسيه عاليه يعني شي يونس

يحفظك الرحمن



الشارقه

علاء المصرى said...

دعوة للتواصل والتضامن
كاتب مصرى**** ملتقا الشعراء

الجودي said...

يا حلات حمني يونس ما عنده مشكله الله يحفظه و يسمح دربة

أما عن اللغة أنا أستخدمها وايد أبيه الحين إلي وياي بالشغل يقولون عني جذي بس مو لدرجة يتحذلقون

لآ أنا أخف بوايد لووول

و المشكله لي تحجييت كويتي احسهم بعد ما يفهمون الحجي يقولون لي وايد لوكل كويتي قح يعني اشلون انتحجى ؟؟؟

TaZmaNiA said...

لووول صج ضحكتني :) ومدونة جميلة

Blog 3amty said...

صاحبك مال مكة عجبني !

وصلّه تحياتي وقولة تقبل الله طاعتك وأعز الناس جذي سوّه !