Search This Blog

Sunday, September 26, 2010

الله يسامح صوت الهند

بسم الله الرحمن الرحيم

مطعم صوت الهند

بعد يوم كروي يتخلله نوم بين كل شوط بالمباريات احاول انام بالليل ماكو نووم كالعاده انام قبل الصلاة بنص ساعه بس

الوالده: يالله وليدي قووم صلاة , و على غير العاده

موا(انا): يمه خلاص قاعد *بصوت جهوووور*إ

الوالده:ليش عسى ما شر شكلك ما نمت

مي(هم انا): و الله ماكو قسطت النومه على اليوم كله و الحين ييت ادفع الدفعه الاخيره قالولي لا يبا ماكو خلصت الي عليك كله

قمت صليت و قلت افتح التلفزيون اتابعلي شي يسوا و انا اصلا ادري شنو بطالع بس استعبط اليوم الــيو اف سي 119 و كل العاده شفتلي شوي طق من صباح الله خير

و خطرتلي فكره من الافكار الغريبه

قمت سبحت طقيت الكندوره و السبعه و اتجهت حق مطعم صوت الهند

مطعم هندي بالديره مميز صراحه من افضل 3 مطاعم هنديه كليت فيها بالضبط الساعه 5.50 انا قاضب الخط و يا حلات الحياة بدون زحمه

دشيت المطعم كان فيه 3 طاولات مأخوذين

طاوله فيها سعودي مفرع و طالب جباتي و قيمه و ماي و هو قاعد ياكل وصخ دشداشته اقدر اقولكم تقريبا فصخها عشان ينظفها

طاوله فيها عسكري طالب قلاص جاي حليب و جباتي و بيض طماط و بدلته لو يكت الحليب عليها مايبين فمستمتع بالاكل و يتمنى اي شي ينكت عليه

الطاوله الاخيره فيها اربعه من شباب الجامعه الي ياين مواصلين تقريبا نفس حالتي , الي لابس شورت و الي لابس بنطلون تقريبا اقرب ماله مكسر و بالجي ما ركزت عليهم الا انه واحد منهم منكبر قفله اقدر اقول انه مقعده يمه و سوالفهم الجت مالي و الـ أي فون مالي و الوانيت مالي و يالله يا فلان تسجيلي ما بقا عليه شي ووووو

اهني انا صفنت و تذكرت ايام جامعتي الموقره جامعة الكويت المحترمه و الافضل بالكويت دون منازع كانت ايام ليتها ترجع بس كنت اول اسبوع ماخذه سياحه ماكو دوام و كنت استغل هذا الاسبوع بالزيارات الي راح تحدد درجاتي اخر الكورس

------------------

مزاج اليوم العماري



Wednesday, July 14, 2010

مقاييس مغلوطه


بسم الله الرحمن الرحيم


عوده بعد كاس العالم2010 مخيب للامال بالنسبة لي اسباب

خروج فريقي الارجنتين بخسارة مذلة من ابناء هتلر

عندي تذاكر كاس العالم و ما قدرت اروح

و عزائي الوحيد ان الي شال كاس العالم ولدنا ايكر كاسياس

--------------------------------------

كويت مكه كويت




مقايس يديده ما سمعت عنها بحياتي الكل يعرف ان المسافه تقاس بالمتر بالكيلومتر و الميل لكن من فتره قاعد اسولف مع واحد و انا اسولف معاه ياله اتصال و اهو كالعاده ما يرد طلب حق اي شخص و اسمعه بكل سعاده يقول انطرني بس اروح البيت ايب جوازي و امرك


و انا : تعال حبيب حمني و ين على الله

حمني: قال ماكو بروح العمره

انا:العمره العمره يعني مكه يعني الحرم يعني السعودية ؟؟

حمني (مع ابتسامه):اي الحين بروح

انا : و متى حجزت انا صارلي فتره معاك ما قلتلي

حمني: لا توا صاحبي قال تدويني بسيارتك قلتله اوكي

انا: و عاديه السالفه يعني ماكو درب, تعب, انت مو نايم, ترا يا حمني من الكويت لي مكه درب مو رايح الشاليهات

حمني (ببتسامه يعني الوضع عادي): لا منو يقول درب عادي كلها
.
.
.
.
.
.
.
.
.
فلاش 4 غيغه المطرف


اهني عرفت ان الوضع عنده عادي و الريال يبي يستانس و يتعبد قلتله يبا انت رايح العمره ما تبي 2 غيغه العفاسي قالي عندي بس من اندش مكان الاحرام راح احطه تدري ما ابي اثم

ههههههههههههههههه

---------------------------------

تكمله لمقاييس مغلوطه


واحد من الشباب من ربع كرة السله و ماله بكرة القدم بس مع كاس العالم قال اتابع و تقريبا كا ما اروح الدوانيه القاه مجابل المبارايات حتى الاعاده و قالي عليوي عندي فكره ودي اوصلها حق الفيفا

قلتله ادلو بلداوك يا فتى
قالي ليش ما يخلون القول الي من ورا خط الـ18 عن خمسه

ليلحين ابي اعرف شنو الهدف من التغير ماني عارف ؟؟؟

----------------------------------

ابو الحروف



طبعا هذا المسمى مو صحيح لكن من كثر ما مدير ادارتي يستخدم كلمات و بغير محلها و يحسسني اني قاعد بمجمع اللغه قاعد احاول ادوره على لقب يوفيه حقه على وزن

الحبر الاعظم

ومن مقتطفاته و كلماته الي اذكرها و راح احط كل مره كلمه يديده لكم بس ابي احد يقولي شلون واحد يستخدم هذي الكلمات بدوام مجاله العملي تجارة يعني مو مدرسة

العاقل خصيم نفسه-
يتوجس-
الحيطه و الحذر (لما قالياها حسسني اني بسوي عمليه انتحاريه)ـ-
السخط-
ودوده-
يتحذلقون (للمعلومه قالي هل كلمه عن موظفين باداره ثانيه)ـ-


------------------------------------------

Sunday, May 30, 2010

نظرية المؤامره يا بو علي

بسم الله الرحمن الرحيم

الله بالخير جميعا

-------------------------------------
!!!! بو علي

قاعد اواجه مشكلة كبيره بالدوام و السبب ان شخص غلط بأسمي جدام موظفين يدد , المشكلة كتالي و ابي حل لاني بالعربي قاعد افكر اغير اسمي

زميل بنفس الاداره يناديني بوعلوه و اتوقع الكل يعرف انه بوعلوه تنقال حق الي اسمه علي ليلحين الوضع سليم , ليش ما يسمعه واحد ويبلش يسميني بو علي ؟؟

المكشلة ان هذا الشخص قالي بو علي مره وحده بس و بعدها وصلتله ان اسمي علي و مشت الامور لكن المشكلة ان قالها جدام اداره كامله و هذي الاداره كل الموظفين اليدد ينادوني بكل مكان بو علي

حاولت اكثر من مره اقول حق جم واحد بس يردون و يقولون بو علي ما ادري عمدا عشان يطفروني و لا خلاص ماكو مفر من الاسم

اقول حق واحد ترا اسمي علي يقولي احلف , تصدق اول مره يمر علي واحد مسمي ولده نفس اسمه


------------------------------------------

نظرية المؤامره


من كثر ما عيبت على الوالد و اخوي العود , ها انا احذو حذوهم و افسر كل شي على انه مؤامره و اخر تفسيراتي المضحكة طبعا اسباب المطالبة بتوقف خدمة البي بي ام تعود الى تدخلات من كبار الشخصيات بالكويت المساهمين بشركة ابل و مطالبتهم بانتشار الــ أي فون و توابعه.


ما ادري هذا التفسير من عقلي الباطن عشان اشتريلي اي فون و لا صج السالفه

----------------------------------
كل هذا بشهر


شهر الرجال

شهر الكره

شهر الحب الشمسي و الجاي

شهر الدواويين ما عدا مباريات الارجنتين

شهر الضحك على فرق الربع

شهر الهبه - و كعادة الكويتين يشجعون الفريق الي يوصل النهائي و بعدها يقولك انا من زمان اشجع هالمنتخب و عشان ما تقولون تراالسنه هبة اسبانيا حتى هذه اللحظة و السبب برشلونه و كاس امم اوروبا السابق

شهر الجزيرة الرياضية فقط

شهر مارادونا الي ماكل الجو على منتخبه بما فيهم ميسي

شهر الي ما يحب الكره يحبها غصب

شهر فيه كابيلو مدرب لمنتخب في بطولة رسمية للمره الاولى

شهر ما فيه نومت عصر

شهر اتوقع انه مايك مبلتع راح يلوع جبدي فيه معني ما اسمعه اصلا

شهر راح استمتع بوجود و اتصالات بو رزيقه ولد اختي كونه سنه اولى كاس عالم

شهر مصر بالثمانين مليون (ما عدا بو تريكه) تشجع ضد الجزائر و انا اشجع الجزائر

شهر يتالق فيه المعلقين و يا كثرهم بالجزيره

شهر راح اوقف فيه افلام و مسلسلات و ايضا سينمات

شهر الغدا و العشا و الندف بالاكل

شهر الكنافه على المنتخب الخسران او الفايز اهم شي الكنافه
.
.
.
.
.


لا جد مو حرام كل هذا يصير بشهر واحد بس

------------------------
صج منو اتشجعون ؟؟

Wednesday, April 28, 2010

قبسني يلي

4 طياير

قطارين

مليون مترو

وجم تكسي

حصيلة السفره من الكويت لمدريد لحضور الكلاسكو

و الي ما يعرفونه

مدريد * برشلونه

_______________

قررنا انا مع بو زيونه و جم واحد من الشباب انروح مباراة الموسم لكن صفا الحال علينا احنا الثنين و توكلنا على الله ورحنا مجريط الاسم العربي لمدريد

و الخطة كتالي حضور 3 مبارايات لمعشوقنا المرينغي

مدريد*برشلونه

العامريه(المريا)*مدريد

مدريد*فالنسيا

تسع ايام من المتعه الكروية و الوناسه و الجو الحلو

لكن !!!

صار الي ما توقعناه تقبس بداية الموضوع و تقبس اخر الموضوع و لله الحمد ان بين هذا التقبس ما كان في تقبس لانه لو في جان انتحرت

--------------------------

التقبس اول السفره


الوصول الى مدريد يوم المباراة الاتصال بصاحبنا راعي التذاكر ليكون الرد كلمني بعد 10 دقايق و لان الهدفمن السفره حضور المباراة كلمته بعد 10 دقايق ليكون الرد كلمني الساعه 3 العصر.

انطر الى الساعه 3 و ارد ادق على الي ما يتسمه ليكون الرد

بولفافوووووور الجهاز مغلق

التفت على صاحبي اقوله و الله جد هذي اخرتها نوصل و ما ادخل المباراة

تقريبا قعدت ادق عليه لي الخمس ماكو رد

دق صاحبي على ديلير ثاني و ناخذ تذاكر بمكان ابعد و بدبل السعر

و بالنهايه يخسر مدريد يعني في اقبس من جذي

تداركت الموضوع سريعا و استخدمت واحد من الاساليب الي احبها بصراحه و اهي انك تقلب القهر الى ضحك و تعيش الحياة و ترا الموضوع سهل ما يحتاج الا ابتسامه.

--------------------

تقبس اخر السفره


بعد لوية المطارات و البركان و لدخنه و متابعتي بالليل مع بو زيون للاخبار بالفندق قبل السفره بيومين انجيك على طياراتنا و له ملغيه نوصل حق ليله السفره انرد انشوف و لا رادين طياراتنا على موعدها لان مطار مدريد رد يشتغل.

ناخذ اجناطنا و نروح المطار مبجر نوصل ننصدم بالوضع

اهي ناس مسدحه

اهي جناط مقططه

اهي لويه

اهي طوابير

ننصدم بالشاشه الطياراه كنسلدو ملغيه كانسلد

استخدم اسلوب الابتسامه فالضحك

يروح بوزيون اشوف شسالفه يعطونه حجز بعد 4 ايام.

---------------

انروح لرجال السفاره ان شاء الله راح اتكلم عنهم بموضوع بروحهم يستاهلون

صارلي اسبوع راجع ابي اعدل نومتي ماني قادر اي حلول ؟؟؟

Thursday, March 25, 2010

ويييييه قديمه !!!!


السلام عليكم ورحمة الله و بركاته

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ثــلاث مواقف اضحكتني و كادت تبيكي



وييييه قديمه

المكان : البيت
اليوم: السيت
المناسبه: يمعة الاهل
الحدث:مسابقات اليهال بعد الغدا

دايما مايكون السبت يوم حافل بالبيت و لله الحمد بما ان امي (الله يخليها) الكبيره فـ يمعة خالاتي تكون ابيتنا

تبدأ اليمعه دايما بالمعايات و النجره لمواضيع عده , لكن الحيز الاكبر من النجره يكون للواصلين متأخر ويبدأ الاستجواب عن سبب التأخر و الي يقول اكيد متأخرين عشان متريقين متأخر و تبون اتأخرونا عن الغدا و الي يقول اكيد طالعين الافنيوز و تتسوقون و احنا ننطر
و و وو و امور ما تخلص

على الغدا دايما يكون تحدي السلطات لان الوالده ما ترضا احد يسوي الوجبة الرئيسة و عندها اسبابها

عقب الغدا لازم جاي بكل انواعه و قهوه و اكيد حلو من ايد الخاله الصغيره الي دايما نقولها و الله حرام ما تسوين محل حلو

بعدها يبدأ صقوووط (بالصاااااد)الشهداء بالصاله و شوي شوي الناس تسحب عمرها لغرف للنوم و يبقون الخوات لمناقشة الاسبوع و انا اجابلهم مع كرت الشوتايم و مباريات على قولت الشوتايم السبت الكروي

اهي نص ساعه و يبدي عافور اليهال و تطلع المواهب تبدي بالرقص و الغناء و لعب الكره و تنتهي بالقران نفس الشي كل اسبوع يكون التسميع عندنا بالسرداب

ويبدون من روئ الى شيخه الى حصة الى صاحبي و صاحب القصه عبدالرزاق

الكل قرا قران و ما كان في مشكله الى ان قراة حصه

وقالت
بسم الله الرحمن الرحيم
{‏قل يا أيها الكافرون لا أعبد ما تعبدون‏}

و اذا بصرخه تهز جبل
(ويييييييييه قديمه)

بعدها صمت من الجمهوور كله و الكل يحاول يفسر كلام بورزيقه
تدخلت و قلتله رزووق شلون يعني قديمه ؟؟
ترا هذي مو غنية و لا مسرحية هذا قران تعرف شنو يعني قران

!!!!! و ترا حتى الي انت قريته قديم

جان يقول لا و الله خالي تونا ما خذينه و الي قرتها حصونه ماخذينها السنه الي طافت

------------------------------------------
!!!!!جلب الداخلية


المكان : الدوام
اليوم: الاثنين
المناسبه: لقاء رئيس وزراء المملكة الاردنية الهاشمية
الحدث: تمشيط المكان من المتفجرات


قبلها بيوم و انا بدوانية اسولف مع مواحد من الشباب الي صارلي فتره ما شفتهم و هو زميل من ايام المتوسط و الثانويه الى ان دخل كلية الشرطه انقطعت العلاقة و صارت بس بالمناسبات و بعض الدواوين ليما قبل سنة فتح دوانيته و قمت اروحلة

بلشت الموضوع اقوله وينك ما تمرنا الدوام ربعك على طول عندنا و هليام ايبون معاهم بنات يمسكون الجلاب(اعزكم الله) عشان التفتيش قالي لا يبا انا مالي خلق قلتله احسلك بس فلان و فلان مو مقصرين مو مخلين الي يفتشون يدخلون الجلاب صوب مكاتبنا


الساعه 8 الصبح يوصلني مسج بو حمود مداوم
رديت اييه
وين مكتبك باي دور
قلتله بالارضي و ليش اذا تبي شي لا تتعنا انا ايبا لي عندك

سحب علي صح

صارت الساعه 10
و انا بحال سبيلي قاعد اكلم شركة بلندن وعيوني على شاشة الكمبيوتر و اذا بصاحبنا و معااااااااااااه

اســــــــــــــــــــــــــــــــــد

و حاطه جبالي

لا شعورين صكيت التليفون بويه الي قاعد اكلمه و تقريبا وقفت على المكتب


نسيت اقولكم اني اخاف من الجلاب


-----------------------------------------
P. F. Chang's



المكان: اكيد الافنيوز
اليوم: الاثنين
المناسبه: طلعت شباب
الحدث: واحد من الشباب بيكمل دكتوراه و الخميس يسافر

لاني متعشي و توني ماكل من تمايم ولد واحد من الشباب اقتصر الموضوع على البيبسي و السوالف على الطاوله

بديناها بشنو تقترحون حق اكل و انتهت الامور عن سوالف الجامعه و الدكاتره و و و و
وحنا طالعين يفتر علي عبيييد و قولي تونا شفنا حمود و حنا ياييين نحجز كان قاعد بره صوب الحصن الي عند الباب

!!!!!!!و سألناه شعندك ناطر قال و الله ماكو بس ناطرين دورنا بنأجر حصن

-----------------------------------

عطلة نهاية اسبوووع ان شاء الله سعيده



Tuesday, March 09, 2010

لاخوانا المصرين ...... نعم لرمز البطة

بكل صراحه فيديو الاسبوع بالنسبة لي طريقة حلو للترشيح لرئاسة جمهورية مصر العربية - او ام الدنيا ان صح التعبير اخليكم مع سلمى رمز البطة طاقة مصرية جديده و ان لم تفوز (وهذا شي اكيد) دائما التمثيل موجود