!!!!! العشاء الاخييير

بسم الله الرحمن الرحيم

يوم من 27
الثلاثاء 19/1/2010

يوووم عادي خالي من الالتزامات عادة ما استغل هذي الايام بالنوم او النوم , لكن اتفاجئ و انا راد البيت من الدواام

امي : لا تنسى اليوم عرس احمد

انا : اي احمد

امي : احمد الــــ؟؟

انا :اكيد اليوم(لاني مالي خلق ارووح اصلا)متأكده مو لسبوع الياي.

امي : لا اليوم

انا: ماشي بس قعدوني قبل المغرب عشان نزهب الامور كلها-ما ادري شنو الامور بس يعني قلمه و قلتها

-

-

قمت على صرخه نستني حتى اي يوم احنا فيه

ليلحين ناااايم

ايه يبه حتى الاذان ما اذن اقوم شسوي

الوالد القائد:انا ما ابي اتأخر
انا : يبا تكفه الحين المغرب و العرس عقب لعشه شلون تتأخر

الوالد: بكل هدوووء انا بلغتك عاد

انا: (بقلبي اقول وين هلهدوء لما قعدني)و ابتسم بويهه و قوله تامر امر

رحنا العرس و وباركان و مشينا

يعني فاست عرس على وزن فاست فوود

-

-

-

وحنا رادين سوالف - ضحك - شوي تقلب الامور جد لان الثلاثي الي بالسيارة كل واحد له طبعه الوالد بطبعه جد و خوي الكبير بطبعه يحب يسولف و انا و لله الحمد احب الضحك بطريقة غريبه

-

-

-

-

اخوي: شعندك

انا : ما عندي شي

اخوي: خلاص تعال معاي الدوانية

انا :ماشي (لان بكل صراحه افضل وقت اروح هذي الدوانية بالذات) , معاك ولا بسيارتي

اخوي: لا معاي ليش بعد بسيارتك

بالدوانية

و ينك بو حمووود يالقاطع و لا ما يتنا الا لما فازوا القادسية على الكويت(علما بان الدوانية معقل نادي الكويت) بس هم نقولك الدوري طويل

من عرض السوالف يبنا طاري بدر المطوع و منو افضل لاعب بالكويت و الامور هذي و انا طول الفتره هذي ساكت ليما نط واحد وقال (ويا ليته ما قال)
بدر المطوع لاعب عاااادي

اول شي طرا على بالي هذا منو اصلا و شيبي بهلـــ مكان

بعدين جان اقوله ترا بدر المطوع لاعب كره قدم مو هوكي

جان يقولي و بلهجه مو حضريه و لابدويه اقدر اسميها خكريه

بدر مبــ لاعب القادسية
قلت اشوه يفهم
و بعد ما تكلم معزبه و قال ان بدر لاعب مو طبيعي جان يقول صح لسانك و زين ما قاله بعد فالك البيرق
و انا بقلبي هذي الاشكال متى نخلص منها بالكويت

اخوي و بنظره تفاهم اكثر من تفاهم الدخيل و جاسم كان القصد منها بس لا تناقشهم وسولف بسوالف ثانيه غير الكره لانك طفرتهم

-

-

-

و انا بنظره مشابهه القصد منها تامر امر

بعدها بشوي مشينا و لسان حال الحضور(الي مالهم شغل بالكره) اشوه مشا و لسان حال الكويتاويه هم اشوا مشا

!!!!العشاء الاخيييير

الوقت يشير الى الحادية عشر مسااااءا

المفروووض البيت لكن اتصل ابــ بو راشد

انا : الووو

بو راشد: هلا و بنبره نوووووووووووووم

انا : و بكل استعبااااط ها نايم

بوراشد:لا بين مايتين

انا: خلاص مارك

بو راشد:حيااااك بس وين؟؟

انا: صارلي سبووووعيين مو متعشي يعني وين مثلا بتمشا معاك على البحر

بوراشد: ماشي , ناطلاك

-

-

كــلعاده نجره وين نتعشا

بما اني ابي عيووووش فــ الخيارات قلت خصوصا مع الوقت المتأخر

الوجهه حولي - مطعم الستينات - اكلت اكل حتى الغباااااااااااءو وقتها عرفت معنى

لا فطنة مع بطنة

,

,

,

ـــــــــــــــــــــــــــــــــــــــــــــ

مبروووك قدوم البرد و الغبار و الحر في يووووم واحد

فكره و نفس الناس قررت ابكتب

بسم الله الرحمن الرحيم

عنوان مستوحا من الشاعر الكويتي حمد السعيد
لما قال : فكره ومثل الناس قررت اببني *** نصيحة كانت من افكار شايب
و هذا انا فكره و مثل الناس قررت ابكتب و كانت الفكره نعم من افكار واحد بس مو شايب.
فكره بكل صراحه كنت اشوفها سخيفة و من سنين و هو يتكلم فيها و يقول عشان ترجع بعد جم سنه و تقرا شكنت اتسوي !!!!

وشنو الفكره عاااد ؟؟؟
بسيط اكتب اهم الشغلات الي تصير بيومك , يعني يا بو يوسف - صاحب الاختراع- اكتب يوميات؟ يقول لا يبا بس اهم الشغلات يعني بالكثير شغلتين باليوم .

طريقة بو يوسف سميتها طريقة العجيري لرتباطها بتقويم العجيري.

و انا بديت بهذي الشغله و لمدة 25 يوم من اول 2010.
و بعدين قلت الفكره حلوه لكن ليش ما تتطور و خصوصا ان الحين كل شي بالانترنت و الطريقة راح يكون فيها مشاركه اكثر.

بحاول اكتب مقتطفات من الــ25 يوم الي طافو و بعدها ان شاء الله راح اكتب بشكل يومي.
بطاقة شخصية سريعه
الاسم : بو محمد
العمر :27
الحاله الاجتماعية: اعزب
هوايات: كره كره كره دوانيه افلام و اكل

بسم الله نبدأ

الثلاثاء 5/1/2010

- تقديم فيزا حق لندن و بعد ما قدمنا كل الجوازات يوصل اتصال ويقولون جواز اختك منتهي !!! شلون منتهي وانتو خذيتوه و خذيتو رسوم قال سوري سييير بس جوازاتكم كانت وايييد (عذر اقبح من ذنب) و البولسي ما لتنا تقول لازم تدفع رسوم مره ثانيه النصب شلون صاير بس كلعاده ندفع و نقوم شدعوه من عرض الخساير.


- عشا مع الشباب بــبرج الحمام و اشكال اللهم لعتراض الي شيشه شيشه و الي زقاير زقاير طبعا كل هذا مو شباب بناااات
نفسة على الشباب و قلت حق بو راشد(على قولت المصرين الانتيييم بتاعي) و الله اشكال .

الاحد 10/1/2010

-عشا تميمت عبدالله ولد بو عبدالله خووش عشا جو حلو شوي و معلم واقف على راسك الي تامر عليه اييك شباب من زمان ما شفتهم و شباب مليت و انا اشوفهم لكن المشكلة ان العشا وقت مباراة مدريد و مايوركا خذيتلي سطلة و ريش و دخلت الدوانية عشان الشوف القييم من طبعي ما اشوف المباراة بره البيت و هذي يمكن اول مباراة من 5 سنيين اشوفها بره بقدرة قادر الشباب و حتى المعلم ما الشوي صار عندنا بالدوانية و الي يقول انا ما اطوف مباراة و المعلم يقول اذا مدريد غولو نادولي , قلت حق الشباب الي اعرفه ان العشا بره شيايبكم و لا الحين الكل يبي يشوف المباراة .
الحمد لله مدريد خلصو القيييم مبجر 2-0 فكنت قاعد اطالع المباراة و انا مرتاح .

الثلاثاء 12/1/2010

-وفود بالدوام واحد ورا الثاني شي من جزر القمر و شي من سلوفينيا
-رحت النادي بعد انقطاع اسبوع معنا صارلي 3 اسابيع من اشتركت !!!!
-رحت دوانية ولد خالي وصلت, نزلت, الدوانية مفتوحه , ماكو احد !!شسالفه ؟؟ الو بو ابراهيم وينكم لا و الله بوحمود مو قاعدين , عموما حصل خير و اليايات اكثر .
-عشا الــبي بي
قاعدين انا و بو راشد سوالف مع احلى قهوه
بو راشد وين العشا ؟؟
كلعاده انا اسأل و انا اجيب لان الشخص هذا في امور ما يتكلم عنها لو شصير منها العشا علما بأنه امور ثانيه ما تقدر تناقشه
قالي و الله كيفك !!! يعني ما سوينا شي
قلتله بسوي برودكاست و بشوف شنو الاقتراحات
شباب ابي اقوى مطعم فلافل بالكويت و عندكم 10 دقايق ....و رجاءا ابي شي يستاهل الواحد يتعناله

من كثر الردود جهازي علق
وبعد فرز التصويت
1. فلافل شرق
2.دودو
3.99

و بما اني كنت بالسالمية فــ دودو كان الخيار و بكل صراحه نعم الاختيار

ـــــــــــــــــــــــــــــــــــــ
بره الموضوع :
متى راح ايي البرد ؟؟

تحت الصيانه

بعد اكثر من 3 سنوات احتمال ارجع اكتب

و سويت حق كل البوستات دليييييت

بس عن شنو اكتب هذا السؤال ؟؟