Search This Blog

Sunday, May 30, 2010

نظرية المؤامره يا بو علي

بسم الله الرحمن الرحيم

الله بالخير جميعا

-------------------------------------
!!!! بو علي

قاعد اواجه مشكلة كبيره بالدوام و السبب ان شخص غلط بأسمي جدام موظفين يدد , المشكلة كتالي و ابي حل لاني بالعربي قاعد افكر اغير اسمي

زميل بنفس الاداره يناديني بوعلوه و اتوقع الكل يعرف انه بوعلوه تنقال حق الي اسمه علي ليلحين الوضع سليم , ليش ما يسمعه واحد ويبلش يسميني بو علي ؟؟

المكشلة ان هذا الشخص قالي بو علي مره وحده بس و بعدها وصلتله ان اسمي علي و مشت الامور لكن المشكلة ان قالها جدام اداره كامله و هذي الاداره كل الموظفين اليدد ينادوني بكل مكان بو علي

حاولت اكثر من مره اقول حق جم واحد بس يردون و يقولون بو علي ما ادري عمدا عشان يطفروني و لا خلاص ماكو مفر من الاسم

اقول حق واحد ترا اسمي علي يقولي احلف , تصدق اول مره يمر علي واحد مسمي ولده نفس اسمه


------------------------------------------

نظرية المؤامره


من كثر ما عيبت على الوالد و اخوي العود , ها انا احذو حذوهم و افسر كل شي على انه مؤامره و اخر تفسيراتي المضحكة طبعا اسباب المطالبة بتوقف خدمة البي بي ام تعود الى تدخلات من كبار الشخصيات بالكويت المساهمين بشركة ابل و مطالبتهم بانتشار الــ أي فون و توابعه.


ما ادري هذا التفسير من عقلي الباطن عشان اشتريلي اي فون و لا صج السالفه

----------------------------------
كل هذا بشهر


شهر الرجال

شهر الكره

شهر الحب الشمسي و الجاي

شهر الدواويين ما عدا مباريات الارجنتين

شهر الضحك على فرق الربع

شهر الهبه - و كعادة الكويتين يشجعون الفريق الي يوصل النهائي و بعدها يقولك انا من زمان اشجع هالمنتخب و عشان ما تقولون تراالسنه هبة اسبانيا حتى هذه اللحظة و السبب برشلونه و كاس امم اوروبا السابق

شهر الجزيرة الرياضية فقط

شهر مارادونا الي ماكل الجو على منتخبه بما فيهم ميسي

شهر الي ما يحب الكره يحبها غصب

شهر فيه كابيلو مدرب لمنتخب في بطولة رسمية للمره الاولى

شهر ما فيه نومت عصر

شهر اتوقع انه مايك مبلتع راح يلوع جبدي فيه معني ما اسمعه اصلا

شهر راح استمتع بوجود و اتصالات بو رزيقه ولد اختي كونه سنه اولى كاس عالم

شهر مصر بالثمانين مليون (ما عدا بو تريكه) تشجع ضد الجزائر و انا اشجع الجزائر

شهر يتالق فيه المعلقين و يا كثرهم بالجزيره

شهر راح اوقف فيه افلام و مسلسلات و ايضا سينمات

شهر الغدا و العشا و الندف بالاكل

شهر الكنافه على المنتخب الخسران او الفايز اهم شي الكنافه
.
.
.
.
.


لا جد مو حرام كل هذا يصير بشهر واحد بس

------------------------
صج منو اتشجعون ؟؟

14 comments:

why me said...

LOL



اشتهيت كنافه

Anonymous said...

انا قوطي بالكرة بس اشجعك واحب الكنافة


يا علي
حبيتك لانك علي

مفروض تخب ام علي يم الكنافة والا انا غلطانة

aL-NooR . said...

كنااااااااااافة
عاد ؟
الحين هابين بــ
chocolatness
o
gathering

;p

الا شخبارك يا بو علي
اتوقع انا عطيتك واجب
بس الظاهر انك طالب كسول
طالع على على
;p


اهاااااااااا
انت من ربع البلاك بيري
والبي بي ...ووااااااو
بس انا اقول
اللي يتعود على
البلاك بيري صعب يغير

الا اذا بييلك
هدية من نفس اللي
شرالك بلاك بيري ؟
ولا انت شاريه
:p

لا تنسى الواجب عندي بالمدونة
على الاقل كمل فيه البوست
انا اشجع ...الصين


تصدق يلوق عليك
اسم مشاري ؟


***********************

سلة ميوّة said...

:)

ضحكتني على موضوع الاسم
انا في وحده بالدوام مطابقة اسمي
ومتهدده الحين صارلي شهر
امشي واهدد اني بغير اسمي
إلى بزّة@@


اما عن المؤامرة
اول ماقريت الموضوع
ياه في بالي سؤال..وممكن اساله؟؟؟

امي شتصير لك؟؟؟


امي ربي يحفظها كل شي عندها مؤامرة!!!!



وعلى التشجيع...

اشجع كل الفرق ..اشجع الشهر هذا بكبره...

لأن الزحمة بتخف..وبرجع نص ساعه أبجر البيت...



ومسى البوستات...

Goalzalez said...

why me
--------
شجعيلج منتخب بفوز و شوفي الدليفري بيلعب لعب وقتها بس انتي راح تدفعين لما يوصل الطلب

Goalzalez said...

Anonymous
----------
لا ليش قوطي , مدام تعرفون القوول و الكره اكيد تفهمين

لعبتي الام علي بس اذا مع الكنفه لازم القهوه تكون حاضره و لا الحارج راح يكون مشكلة

Goalzalez said...

aL-NooR
----------
اهلا بالنوور

انا مو من ربع

chocolatness
o
gathering

هذي سوالف خواتي كل يومين يايبيلي من هل سويييتس و انا مثل البالوعه هات يا اكل بس مو مقصرين صراحه

و على البي بي نفس ما قلتي الي يتعود عليه و عنده كوناكتس وايد وقراب منه صحب يهده

بس شدراج ان البلاك بيري هديه ؟؟

يا حضي الصين مو صاعده كاس العالم

لا بو مشاري احلا

Goalzalez said...
This comment has been removed by the author.
Goalzalez said...

سلة ميوّة
----------
اختي عندها نفس المشكلة بالاسامي و لان اسمها منتشر و اسم الوالد منتشر صار عندها مناعه الحين

يا حلاة اسامي قبل انا معاج قلبا و قالبا و اذا تبين احد بالعدل عشان تغيرين لي بزه ان حاضر

امج الله يخليها اكيد خالتي باي ديفولت لانها اكبر مني و يقولج الي يستخدم نظرية المؤامره دايما يكون صاحب افق بعيد - اشكره قاعد ارفع حق عمري

اذا انتي ما تحبين الزحمه اذا انتي معاديه للدراسة مثلي لاني قمت وناستي لما تيني اختي الصغيره و تقولي علي ترا باجر ماكو دوام يعني ماكو زحمة يعني راح انام ازيد شوي

AM.SA.CHANNEL said...

أول شي يا بوعلي أقصد يا علي .. خخخ أدري موول مب وقته أتمصخر .. بس أبسط حل و أريح حل و أسهل حل، اللي بيقولك بو علي طنشه، و إذا تم يقولك بو علي كم من مره، قوله تزقرني إذا قالك هي قوله إسم علي و رووح و إذا كان صدق يباك بيرد يزقرك علي

أحسن شي و الله بيتأدبووون كلهم ..

و ثاني شي عن الكره و ما أدراك ما الكرة لاعت جبدي الصراحة من الكرة، كنت أحب أطالع أطمش شوي، لكن الحين ماشي روح رياضية و لازم عقب كل مباراة تستوي ظرابه لوعوولنا بجبدنا

وشكرا

ARTFUL said...

حبيتك لانك ارجنتيني

;p

عزيز وغالي يا بوعلوه

كوكتيل said...

اللي يناديك بغير إسمك لا ترد عليه لين يمل ويتسنع إذا كان يستعبط وإذا كان ما يعرف راح يسأل ويعرف :)
أنا مو حيل بالكورة بس أشجع اللعب الحلو :)

والخسران ييب لنا فطاير ونحلى ببراوني لو سمحتوا:)

يعطيك العافية :)

TaZmaNiA said...

عاش الارجنتيني :)

aL-NooR . said...

ما من جديد ؟

اسأل ربي ان يجدد ايامك
:)

**********************