ويييييه قديمه !!!!

السلام عليكم ورحمة الله و بركاته

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ثــلاث مواقف اضحكتني و كادت تبيكي

وييييه قديمه

المكان : البيت

اليوم: السيت

المناسبه: يمعة الاهل

الحدث:مسابقات اليهال بعد الغدا

دايما مايكون السبت يوم حافل بالبيت و لله الحمد بما ان امي (الله يخليها) الكبيره فـ يمعة خالاتي تكون ابيتنا

تبدأ اليمعه دايما بالمعايات و النجره لمواضيع عده , لكن الحيز الاكبر من النجره يكون للواصلين متأخر ويبدأ الاستجواب عن سبب التأخر و الي يقول اكيد متأخرين عشان متريقين متأخر و تبون اتأخرونا عن الغدا و الي يقول اكيد طالعين الافنيوز و تتسوقون و احنا ننطر

و و وو و امور ما تخلص

على الغدا دايما يكون تحدي السلطات لان الوالده ما ترضا احد يسوي الوجبة الرئيسة و عندها اسبابها

عقب الغدا لازم جاي بكل انواعه و قهوه و اكيد حلو من ايد الخاله الصغيره الي دايما نقولها و الله حرام ما تسوين محل حلو

بعدها يبدأ صقوووط (بالصاااااد)الشهداء بالصاله و شوي شوي الناس تسحب عمرها لغرف للنوم و يبقون الخوات لمناقشة الاسبوع و انا اجابلهم مع كرت الشوتايم و مباريات على قولت الشوتايم السبت الكروي

اهي نص ساعه و يبدي عافور اليهال و تطلع المواهب تبدي بالرقص و الغناء و لعب الكره و تنتهي بالقران نفس الشي كل اسبوع يكون التسميع عندنا بالسرداب

ويبدون من روئ الى شيخه الى حصة الى صاحبي و صاحب القصه عبدالرزاق

الكل قرا قران و ما كان في مشكله الى ان قراة حصه

وقالت

بسم الله الرحمن الرحيم

{‏قل يا أيها الكافرون لا أعبد ما تعبدون‏}

و اذا بصرخه تهز جبل

(ويييييييييه قديمه)

بعدها صمت من الجمهوور كله و الكل يحاول يفسر كلام بورزيقه

تدخلت و قلتله رزووق شلون يعني قديمه ؟؟

ترا هذي مو غنية و لا مسرحية هذا قران تعرف شنو يعني قران

!!!!! و ترا حتى الي انت قريته قديم

جان يقول لا و الله خالي تونا ما خذينه و الي قرتها حصونه ماخذينها السنه الي طافت

------------------------------------------

!!!!!جلب الداخلية

المكان : الدوام

اليوم: الاثنين

المناسبه: لقاء رئيس وزراء المملكة الاردنية الهاشمية

الحدث: تمشيط المكان من المتفجرات

قبلها بيوم و انا بدوانية اسولف مع مواحد من الشباب الي صارلي فتره ما شفتهم و هو زميل من ايام المتوسط و الثانويه الى ان دخل كلية الشرطه انقطعت العلاقة و صارت بس بالمناسبات و بعض الدواوين ليما قبل سنة فتح دوانيته و قمت اروحلة

بلشت الموضوع اقوله وينك ما تمرنا الدوام ربعك على طول عندنا و هليام ايبون معاهم بنات يمسكون الجلاب(اعزكم الله) عشان التفتيش قالي لا يبا انا مالي خلق قلتله احسلك بس فلان و فلان مو مقصرين مو مخلين الي يفتشون يدخلون الجلاب صوب مكاتبنا

الساعه 8 الصبح يوصلني مسج بو حمود مداوم

رديت اييه

وين مكتبك باي دور

قلتله بالارضي و ليش اذا تبي شي لا تتعنا انا ايبا لي عندك

سحب علي صح

صارت الساعه 10

و انا بحال سبيلي قاعد اكلم شركة بلندن وعيوني على شاشة الكمبيوتر و اذا بصاحبنا و معااااااااااااه

اســــــــــــــــــــــــــــــــــد

و حاطه جبالي

لا شعورين صكيت التليفون بويه الي قاعد اكلمه و تقريبا وقفت على المكتب

نسيت اقولكم اني اخاف من الجلاب

-----------------------------------------

P. F. Chang's

المكان: اكيد الافنيوز

اليوم: الاثنين

المناسبه: طلعت شباب

الحدث: واحد من الشباب بيكمل دكتوراه و الخميس يسافر

لاني متعشي و توني ماكل من تمايم ولد واحد من الشباب اقتصر الموضوع على البيبسي و السوالف على الطاوله

بديناها بشنو تقترحون حق اكل و انتهت الامور عن سوالف الجامعه و الدكاتره و و و و

وحنا طالعين يفتر علي عبيييد و قولي تونا شفنا حمود و حنا ياييين نحجز كان قاعد بره صوب الحصن الي عند الباب

!!!!!!!و سألناه شعندك ناطر قال و الله ماكو بس ناطرين دورنا بنأجر حصن

-----------------------------------

عطلة نهاية اسبوووع ان شاء الله سعيده

لاخوانا المصرين ...... نعم لرمز البطة

بكل صراحه فيديو الاسبوع بالنسبة لي طريقة حلو للترشيح لرئاسة جمهورية مصر العربية - او ام الدنيا ان صح التعبير اخليكم مع سلمى رمز البطة طاقة مصرية جديده و ان لم تفوز (وهذا شي اكيد) دائما التمثيل موجود

تهوس و لشط كوالتي نت و سهرة ريال مدريد الجنونية

ويييك اند يعتبر ممل لكن نهايته ممتعه لاسباب راح اذكرها

كوالتي نت و طريقة اللشط(حق الي مالهم بالحداق - لما تخلي السمجه تاكل بالييم و تلشطها مره وحده) صراحه طريقة مميزه بالتسويق او التزحييف ان صح التعبير الاسباب

انت بحال سبيلك مشترك 2 ام بي اتسافر و لانك موقت تجديد اشتراكك مع المعرض مال كل سنه تنسى اتجدد , ترجع طايفك وايد بالنت طبعا مو اخبار و لا امور ثانيه كل الي طايفك حلقات و مسلسلات متابعها راح اتكلم عنهم ابـ بوست ثاني ان الله احيانا معاكم

احلا تورنت بس المشكلة من كثر ما النت بطيء بدون مبالغه غووغل ما يفتح بس يعطيك السجنل فول

فانت بديهين راح ترفع التليفون وتكلم كوالتي هذا الي صار و صدمني انه خالص الاشتراك من اسبوعين و اقوله وشلون شغال قالي ايه بس مسكرين الحنفيه يعني ربك واحد ماكو صفحه تقدر تفتحا لك خاطر تجدد ترا عندنا عروض يديده

طبعا جددت الاشتراك مع مضاعفة السرعه يعني اذا صار بكوالتي شي اكييد من الداونلود الي انا قاعد اسويه

طريقة الدفع مع كوالتي

كوالتي : الو بو محمد

انا : هلا امر

كوالتي :معاك كوالتي اكلمك بخصوص الاشتراك و الدفع

انا : اي حياك و شكثر يبيلك

كوالتي :انا تحت عند البيت

انا : و منو قالك انه انا فوق - ههههههه

رحتله و عطيته المبلغ

قالي: على طريقة توصيل المنازل مافي خرده

قلتله: لا و الله , عموما خل الباجي

قال: لا و الله لازم تاخذ الباجي

قلتله: ماشي انطرك

قالي: لا حياك اركب معاي ركبت و رحنا و انا ميت ابي اعرف شنو قاعد يسمع اغاني دايما يحوشني هذا الفضول لمعرفة اذواق الناس

بدون مقدمات شقاعد تسمع

الريال تردد

شفيك عادي خلنا نسمع

شغل و يا ريته ما شغل حسيت انا شوي وراح يوقفونا بسيطره عراقيه

و الريال شوي و يهوس بس قلتله خلاص وقت اذان معنا باقي على المغرب يمكن اكثر من ساعه

-------------------------------------------------

سهرة ريال مدريد و اشبيليه

ليله من الزمن الجميل

مباراة للذكرى و المتعه و عنوان للاصرار

انتهت بفوز الريال و اعتلاء قمة الدوري الاسباني خصوصا بعد تعادل برشلونه مع ألميريا

طبقا لمعلومات بو غازي

شلون ما تعرف ألميريا - و الله اعرفه بس كفريق و ان الاسم عربي مو اكثر

هذي ألميريا و الله لو تقرا عنها يكش شعر يمبك - للاسف ما قريت يا بو غازي

منطقة ايام المسلمين كلها علماء يعني جنها بريده الحيييييين - - ضحكت ليما راااااح صوتي

-------------------------

ليش سنه كامله محد يدق علي يقولي تعال اطلع بحر معانا و بيوم واحد تحصلي 3 طلعات و ما اقدر اروووووح

-------------------------

قطة اليوم

زميل بالدوام يكلم واحد بالتليفون يقوله غلطان شلون ايييك انت تدري ان من دوامي لي عندك لازم اصب بانزين بــ 20 ديناااااار - و الله لو هليكوبتر

بعدك الوضع سلطه يا ريحااااااان

كالعاده اول يوم دوام بعد الاجازه الكل يتذمر و الكل يبي يسحب على الدوام و الكل يقول اخ بس لو كمل نومتي و اخ و اخ و اخ

منذ نعومت اظافري(حلوه هذي)و انا استمع بهذي الايام و استغرب لما اختي لصغيره تقول حق امي باجر ماني مداومه او يمه ذكري راح اتمريني باجر لان ماكو احد بالمدرسه (و كأنه تهديد) . الامور هذي ما كانت تهمني و لا حتى الدراسه لان بكل اختصار لعب الكره بالمدرسة الصبح كان تقريبا هدفي الاساسي حق روحت المدرسة

و الحين الوضع ما تغير و صار بالعكس بالنسبة لي احسن مليونه لا عدة اسباب

1. ماكو زحمه

2. ماكو مراجعين او بالاحره ماكو احد مداوم

3.تعرف الي يبي يحلل معاشه والي مو هامه و انا بصراحه يهمني اعرف هذا النوع من الناس

×÷×÷×÷×÷×÷×÷×÷×÷÷×÷××÷×÷×÷×÷×÷×

شلون تصحاا الصبح و انت رايح الدوام

ناس و ايد و تقريبا الاغلبيه من الناس راح تقول

1. دووش

2. قهوه +فيروز

3.لا تنم اصلا و روح مواصل و طبعا هذا بالنهايه راح يخليك تنام اول ما توصل الدوام

4.قزرها على اي واحد من الشباب طول الدرب سوالف معاه بالتليفون

الامور الي طافت كلها صحيحه لكن انا استخدم طريقة ثانيه

طريقة الــIpod

سهله و ما يبيلها اي شي

1.Ipod

2.لازم تحطه مكان القلاص الي بسياره

3.توصله على الـ aux

4.Shuffel*

5.الصوت على الـ30 -ما ادري ليش 30 بس احس انه هذا الرقم يعتبر كبير على كل السياير

6.play

7.طبعا اي اغنية عربيه طاف - مو من كثرهم عندي- و اي غنيه سلو طاف نبي شي يصحنا يا جماعه هذا المطلوب

لازم السبابه على الي اطوف الاغاني و ليما تحصلون اغنية تصحي حتى الخلايا النايمه و تمتع

ايام الدوام العادية تقريبا اطوف اكثر من 80 اغنية و دربي كله 15 الى 20 دقيقة

+_+_+_+_+_+_+_+_+_+_+

الريوق

احنا 4 بالاداره

انا و هقاش (هذا لقب مو اسم الشخص للمعلومه) ملقبين باصحاب الفطور الراقي او النظيف

و الاثنين الثانيين يشترون من مطعم يم الدوام علما مرات نشتري معاهم بس على قولتهم انتو دايما طابخينها و تشترون من المطاعم النظيفه او يقولون في احد يتريق ب 4 دنانير

الي عنده مطاعم طيبة بالديره يعطينا اسامي

-----------------------------------------

New tea-boy

مرات اشوف انه اهم منصب بالدوام هذا المنصب و الله مو طنازه بس الصبي اذا ياك يعرف كل شي ما تتعب بس بالاشاره يسوي الي تبيه

بعدك الوضع سلطه يا ريحااااااان

بعد ما سافر ريحان - الصبي مال الدوام- صارة ادارتنا معسكر للفراشين كل يوم فراااش

سيمون: تطلب منه جاي حليب ايبك قهوه

ازمييير : تطلب ريوق يصير غدا

جاسم : و لله الحمد نوعا ما اوكي بس مشكلته انه اول ايامه كان منفس بس اليوووم طلع معدنه الطيب

-------------------------------